الكلمة نزلت عليا زي الصاعقة. حسيت إن الروح بتتسحب مني. بنتي انهارت من شدة الصدمة، والدكاترة حاولوا يهدوها، لكنها كانت مش قادرة تستوعب اللي حصل.
في اللحظة دي، لقيت جمال بيشدني على جنب. وشه كان شاحب وصوته بيترعش من الخوف. قال لي: “يا حبيبتي، أنتِ أكيد عارفة إني ما كنتش أقصد. أنا كنت منفعل، وربنا يعلم إني ما أردتش يحصل لها حاجة. دلوقتي المستشفى ممكن تبلغ الجهات المختصة، وأنا كدة مستقبلي يضيع. خلي بنتك تقول إنها وقعت وهي بتلعب، عشان تحميني.”
أنا كنت مصدومة. دماغي مش قادرة تستوعب حجم الكارثة، ولا الخوف اللي تملك مني. كنت حزينة ومكسورة على حفيدتي اللي راحت في لحظة تهور، لكن في نفس الوقت، الضعف خلاني أفكر في جمال، الراجل اللي حسيت معاه إن لي قيمة ووجود بعد سنين من الوحدة.
بصيت له بعيون زايغة، وجسمي بيترعش، وهزيت رأسي بالموافقة من غير ما أنطق كلمة.
مشيت بخطوات تقيلة ومترددة لداخل الأوضة. بنتي كانت لسة منهارة، ومش قادرة تستوعب فقدان بنتها. قربت منها بتوتر شديد، وحطيت إيدي على كتفها وقلت لها بصوت مخنوق وبيترعش: “اهدي يا قلبي، اهدي يا ناهد عشان خاطر ربنا، البكاء مش هيرجعها.”
ناهد رفعت رأسها ببطء، وبصت لي بحدة وعيون مليانة ألم. كانت نظرتها كأنها بتسألني سؤالًا ما قدرتش أهرب منه: هل أنا السبب في كل اللي حصل؟ هل أنا اللي دخلت جمال حياتنا وسمحت له يعيش معانا؟
أنا ارتبكت جدًا من نظرتها، وما استحملتش الشك اللي كان ظاهر في عينيها. فرديت بقلة حيلة وباندفاع وأنا بحاول أحمي موقفي وموقف جمال: “أنا ذنبي إيه بس يا ناهد؟! اللي حصل ده قدر ومكتوب. ياريت تكبري عقلك وتفكري في اللي جاي. لما يجي المسؤول، قولي له إنها كانت بتلعب ووقعت على طرف الحيطة. محدش كان متوقع إن الأمور توصل لكدة يا بنتي!”
