بعد انتهاء المحاضرة الأولى، نجد الفتيات الثلاث، همس وميان ولينا، يجلسن أمام السيارة.
كانت لينا تقضم الشطيرة التي بيدها وهي تضحك على ما تقوله ميان:
“بجد حاجة تقرف. دكتور مستفز، نفسي أعرف مين اللي سماه جميل! مش لايق على اسمه خالص.”
ابتلعت لينا ما بفمها قائلة بمرح:
“عينيه طول المحاضرة عليكي، بيبصلك بإعجاب.”
همس بمرح وهي ترتشف من قهوتها:
“يا بنتي ولا يهمك. شاوري إنتِ بس وأنا أخلي الموضوع ينتهي.”
ضحكت ميان بخفوت، لتردد لينا بمرح:
“طول عمرك جدعة يا همس، اللي بيجيب حقنا.”
ضحكت ميان بقوة، بينما نظرت همس إلى لينا بغيظ:
“اخرسي يا سحلية إنتِ.”
كادت الاثنتان أن تتشاجرا، فأوقفتهما ميان قائلة:
“اهدوا انتوا الاتنين بقى. عندنا محاضرة دلوقتي، يلا عشان ما نتأخرش.”
بالفعل ذهب الثلاثة، لكن ميان توقفت للحظات وهي تخرج هاتفها الذي اهتز بيدها معلنًا عن وصول إشعار جديد من أحد الحسابات التي تتابعها على مواقع التواصل.
وجدت أن الحساب يخص الشخص الذي ما زال يسكن قلبها.
فتحته باشتياق ولهفة، متمنية أن ترى صورة جديدة له، لكن سرعان ما تبدلت لهفتها إلى حزن عندما وجدت له صورة برفقة زوجته، وهما يبدوان سعيدين.
أخذت تتساءل بحزن وهي تلحق بهمـس ولينا:
لماذا نسيها واستبدلها بأخرى؟ لماذا أخذها بذنب لم ترتكبه؟ لقد كانت طفلة لا تفهم شيئًا. وكأنه كان ينتظر سببًا للابتعاد، ثم ابتعد.
في نفس الوقت، توقفت سيارة سوداء فخمة أمام مبنى كلية الطب، وترجل منها ذلك الشاب الوسيم صاحب الواحد والثلاثين عامًا، وهو يخطو إلى داخل المبنى بهيبة ووقار، متوجهًا إلى القاعة التي سيدرس بها محاضرته.
ما إن دخل، انخفضت الأصوات تدريجيًا حتى عم الصمت.
مالت همس على ميان قائلة بسخرية وبصوت منخفض:
“والله بعد الدخول ده والأناقة دي، هيطلع مجرد شاحت البدلة.”
كتمت ميان ضحكتها، هي ولينا التي سمعت صوت همس بصعوبة.
صعد يزن إلى المنصة، وعرف بنفسه بكل هدوء:
“أنا الدكتور يزن مهران، أظن معظمكم عارفني. إن شاء الله هدرس لكم السنة دي مادة…”
ثم ارتدى نظارته قائلًا بجدية:
“نتفق الأول على شوية حاجات عشان نمشي مع بعض طول السنة من غير مشاكل. مش بحب الاستهتار، واللي هيتأخر عن المحاضرة حتى لو دقيقة بعد دخولي، الأفضل ما يدخلش. مش بحب عدم الالتزام بالمواعيد، لأن الالتزام مهم عندي. دلوقتي نبدأ المحاضرة، ولو محدش عنده أي أسئلة.”
بالفعل بدأ في الشرح، لينال شرحه إعجاب الجميع.
بعد حوالي ساعتين ونصف، خرج من القاعة وخلفه الطلاب، وكان أولهم ميان ولينا وهمس.
وما إن خرجت همس من المدرج حتى قالت بسخرية وابتسامة مرحة:
“شكله كده شاحت البدلة والله! وقال إيه يزن مهران، شكله هيطلع سباك.”
نظرت إلى لينا وميان، اللتين كانتا تنظران إلى شيء خلفها بحرج شديد.
نظرت همس للخلف، فوجدت يزن خلفها.
اقترب منها قائلًا بجدية:
“الظاهر إنك ما تعرفيش إن الاحترام له حدود، عشان تتكلمي عن دكتورك بالطريقة دي.”
ابتلعت همس ريقها بتوتر وقالت بصوت منخفض:
“والله شكلي هعيد سنة في الكلية دي.”
ثم رفعت صوتها وقالت بتحد:
“بلاش غلط يا دكتور، أنا محترمة.”
يزن بسخرية:
“آه، واضح جدًا. عمومًا جهزي نفسك، لأنك هتتعلمي إن التصرفات لها نتائج، إلا إذا اعتذرتي دلوقتي.”
همس بغيظ:
“إنت بتهددني ولا إيه؟ أنا همس عاصم الشريف، بنت اللواء عاصم الشريف. يعني لو سألت عني هتعرف أنا مين.”
يزن بسخرية:
“وإيه علاقة ده بالموضوع؟”
جزت على أسنانها بغضب ثم قالت بتحد:
“أنا بس مش هسمح لحد يقلل مني.”
اشتعل غضبه قائلًا بحدة:
“أنتِ محتاجة تتعلمي تختاري كلامك كويس. ولو مش بنت عاصم، كنت هوقفك عند حدك من أول كلمة.”
ثم ذهب وتركها وهو يشعر بالغضب الشديد منها، لكنه تمالك نفسه ولم يتجاوز حدوده معها.
أما هي، فقالت بغضب:
“مين دي اللي محتاجة تتعلم يا بارد إنت؟”
ميان بضيق:
“طول عمرك بتحبي المشاكل قدام عينك، وفي يوم هتودينا في مشكلة يا همس.”
لينا بغيظ:
“هو كان محترم، وإنتِ اللي استفزتيه.”
همس بضيق:
“خلاص إنتِ وهي، اللي حصل حصل. وشكلي كده هفضل طول السنة في مشاكل معاه.”
نظرتا إليها بغيظ، ثم غادرن المكان واتجهن لتناول الغداء في مطعم قريب.
كل ذلك وهمس تفكر كيف ترد على ذلك الدكتور الذي أحرجها، رافضة الاعتراف بأنها هي من بدأت الاستفزاز.
بعد يوم شاق في العمل، توقف سفيان بسيارته أمام فيلا العزايزي الكبيرة، ولم يكن يرغب في الدخول، لأنه يعرف أن جدته ستبدأ حديثها المعتاد عن ضرورة الزواج مرة أخرى، خصوصًا أنها غير راضية عن اكتفائه بزوجته التي يعشقها.
زفر بضيق ثم دخل للداخل قائلًا بتعب لجدته فريدة، التي كانت تجلس أمام شاشة التلفاز الكبيرة في غرفة المعيشة:
“مساء الخير، إزيك يا ديدا؟”
جدته بحنان:
“كويسة يا حبيبي، إنت أخبارك إيه؟”
سفيان بتعب:
“بخير يا حبيبتي. بس النهارده الشغل كان كتير أوي، يوم متعب جدًا ومش قادر خالص.”
فريدة بحنان:
“ربنا يقويك يا حبيبي.”
سفيان بتساؤل وهو يقف ليغادر:
“صحيح فين نرمين؟”
فريدة بتهكم:
“هتكون فين يعني؟ خرجت مع صحبتها زي كل يوم.”
سفيان بضيق:
“في إيه بس يا فريدة؟ نفسي أعرف، مبتحبيش نرمين ليه؟ مش أنا وهي بنحب بعض ومبسوطين سوا؟”
فريدة بغضب:
“مش بحبها لأنها مش بتاخد الحياة بجدية، وكل اهتمامها بأصحابها وخروجاتها. وكمان مش قادرة تخلف لك طفل.”
سفيان بضيق:
“يا حبيبتي نرمين كويسة. بعدين أنا ببقى في الشغل طول اليوم، خليها تخرج مع صحبتها بدل ما تزهق. وكمان نفسيتها تتحسن. مش سهل إن واحدة تعرف إنها مش هتبقى أم، وأنا مبسوط معاها وبحبها. دول مش كفاية؟”
فريدة بضيق:
“اللي يريحك. أنا خلاص فقدت الأمل منك. وبعدين خالتك نفسها تشوفك وتطمن عليك. بقالها سنين بعد ما أمك كاميليا سافرت.”
سفيان بغضب:
“فريدة، أنا مش عايز أعرف أي حاجة تخص كاميليا أو أي حد من عيلتها. متهمنيش بحاجة تخصهم. لو سألتك تاني، قوليلها إن الموضوع انتهى بالنسبة لي.”
فريدة بحزن:
“سفيان، ما تخدش حد بذنب حد تاني، عشان الظلم وحش يا ابن شريف.”
سفيان بغضب:
“محدش منهم يهمني، ومش عايز أعرف حاجة عنهم.”
كاد أن يذهب، لكنها أوقفته قائلة:
“طب وميان؟”
توقف مكانه بصدمة بعدما سمع اسمها، تلك التي كانت يومًا من أحب الناس إلى قلبه، لكنه حاول أن يخفي كل مشاعره الآن.
التفت لها قائلًا بجمود:
“مالها؟”
فريدة:
“مش عاوز تشوفها؟”
تنهد بعمق وقال بصرامة:
“سبق وقلتلك، أي حاجة تخص كاميليا أو أي حد قريب منها ما تهمنيش. ياريت نقفل سيرتهم بقى.”
أعطاها ظهره ثم غادر متوجهًا مباشرة إلى غرفته.
في نفس الوقت، كانت ذكريات قديمة تمر في ذهنه.
ابتسمت له نرمين برقة، فقال هو بهدوء:
“بس ياريت تخففي خروج، مش كل يوم تخرجي مع صحباتك.”
نرمين بضيق وحزن:
“يعني أقعد في البيت؟ مش بلاقي حاجة أعملها، فبخرج أفك عن نفسي مع صحابي. مش كفاية إني مش قادرة أكون أم وأجيبلك الطفل اللي نفسك فيه؟ مش بحب أقعد عشان أسمع كلام من جدتك.”
سفيان برفق:
“أنا ما قلتلكيش تتحبسي وما تخرجيش يا حبيبتي. أنا بقول خفي شوية. ولو عايزة تجيبي صحباتك هنا بدل الخروج، وأنا هتكلم مع فريدة. ما تزعليش نفسك، دي إرادة ربنا.”
أومأت له بحزن، ثم توجهت إلى غرفتها.
أما هو فبدل ملابسه، ثم توجه إلى غرفة شقيقه عمار كعادته.
بينما في غرفة قريبة منه، كان عمار العزايزي يجلس على فراشه يعبث بهاتفه، الذي تعالى رنينه.
أجاب سريعًا عندما عرف هوية المتصل قائلًا بمرح:
“حبيبتي يا ميمونة، والله يا ميمونة.”
جاءه صوتها بغيظ:
“اخرس يا زفت وبطل تقولي ميمونة.”
عمار بمرح:
“بهزر معاكي يا ميمونة.”
أجابته بضيق:
“أنا غلطانة إني عبرتك واتصلت بيك.”
ضحك عمار قائلًا:
“خلاص يا بنتي، سكت أهو. قوليلي إيه سر المكالمة دي؟ ما أنا عارفك مصلحجية.”
أجابته ببراءة:
“أنا؟ ده أنا كيوت وبريئة خالص.”
عمار بسخرية:
“آه، إنتِ هتقوليلي؟ ده أنا عارفك وحافظك. لخصي، عايزة إيه يا ميان؟”
ميان بدلال:
“مش أنا بنت خالتك حبيبتك ميان؟”
عمار بضحك:
“طبعًا يا قلبي، هو أنا عندي كام ميان؟ روحي وقلبي. يلا، عايزة إيه؟ الفضول هياكلني.”
ميان بضحك:
“بصرف النظر عن الكلام اللي قولته ده، بس أنا عايزة أطلب منك طلب.”
عمار بفضول:
“قولي يا حبيبتي.”
ميان بتردد:
“عايزاك في مهمة.”
عمار بفضول:
“خير ولا شر؟”
أجابته بضيق وتردد:
“شر. مستنياك بكرة في الجامعة الساعة تسعة الصبح.”
عمار بحماس:
“أوك. هترجعونا لأيام الشقاوة تاني.”
ميان بابتسامة:
“سلام يا عمار.”
أغلق الاثنان الخط، غافلين عن شخص استمع لما دار بينهما وفهم الحديث بشكل خاطئ.
كان سفيان، الذي جاء ليطمئن على شقيقه، فسمع عمار يقول:
“طبعًا يا قلبي، هو أنا عندي كام ميان؟ روحي وقلبي.”
علم أن شقيقه سيذهب للقائها في اليوم التالي.
كور يده بغضب، وهو يظن أن ميان تحاول التقرب من شقيقه، وهو لن يسمح بذلك.
الفصل الثاني
بعد أن أنهى يزن عمله في الجامعة، توجه إلى المستشفى الكبيرة الخاصة بعائلته ليمارس مهنته التي يعشقها.
انتهى من عمله وعاد إلى الفيلا منهكًا ويشعر بالتعب.
التقى بوالدته التي كانت تنتظره حتى يعود، فقبل جبينها ثم استأذن منها ليصعد لغرفته، لكنها أوقفته قائلة بحدة:
“يا بني، حرام عليك اللي بتعمله في نفسك ده. لا إنت أول ولا آخر واحد يفقد شخصًا عزيزًا.”
قاطعها قائلًا بصرامة:
“ماما لو سمحتي نقفل على الموضوع ده. أنا تعبان وعايز أطلع أرتاح، عندي شغل بكرة الصبح.”
كاد أن يغادر، لكنها قالت بغضب:
“استنى عندك. أنا بكلمك من الاحترام والتربية يا دكتور، إنك تقف تسمع أمك لحد ما تخلص كلامها.”
التفت لها بصمت، لتتابع:
“بتتعب نفسك ليه؟ مش قادر تستوعب إن الحياة لازم تكمل؟ بسمة راحت، وإنت لازم تتقبل ده. حياتك كلها شغل، ومش عايز تفكر في ارتباط أو زواج. حتى إحنا اللي اسمنا عيلتك بقينا بنشوفك صدفة.”
أجابها بحزن:
“بالنسبة ليكي الحياة لازم تكمل، لكن بالنسبة ليا كل حاجة اتغيرت لأنها كانت حياتي كلها.”
قالها ثم صعد لغرفته.
ألقى أغراضه بإهمال على الأريكة، واتجه إلى الصورة الكبيرة المعلقة على الحائط التي تخص حبيبته الراحلة.
قال بحزن وعيناه تلمعان بالدموع:
“فراقك صعب أوي، والأصعب إني مش قادر أتجاوز إن حياتك انتهت بالطريقة دي. وحشتيني أوي.”
تنهد متابعًا:
“محدش كان بيفهمني غيرك.”
ثم ألقى بجسده على الفراش، وظلت عيناه مثبتتين على صورتها كعادته كل يوم حتى غلبه النوم، متمنيًا أن يراها في أحلامه.
