
بقاعة المحاضرات بكلية الطب، كان الجميع بالداخل بانتظار وصول الدكتور يزن.
ما إن دخل حتى عم الصمت المكان، بينما بحث عنها بين الجميع، وكان يريد أن يضع حدًا لتصرفاتها.
قال بصرامة وهو يوجه كلامه إلى همس:
“إنتِ يا آنسة.”
انتفضت همس مكانها قائلة:
“بسم الله الرحمن الرحيم… في إيه؟”
تعالت ضحكات الجميع، وسرعان ما عم الصمت مرة أخرى بعدما ألقى عليهم يزن نظرات حادة.
قال لهمس:
“دي محاضرة يا آنسة. مش كفاية تدردشي أثناء الشرح؟ أنا نبهت عليكم امبارح. الفوضى وقلة الالتزام ممنوعة في محاضرتي.”
ثم أشار إلى الباب:
“اتفضلوا بره، ولما تتعلموا تلتزموا بقواعد المحاضرة، ابقوا احضروا.”
نظرت له همس بسخرية رغم غضبها، بينما نظرت لينا وميان لها بغيظ لأنها تسببت في المشكلة.
جمعت همس أشياءها قائلة ببرود:
“تمام يا دكتور. على العموم كويس إنها جت منك، أصل إحنا جعانين وعايزين نفطر.”
ثم غادرت المكان برفقة ميان ولينا، اللتين كانتا غاضبتين منها بشدة.
وقفت الفتيات الثلاث أمام باب الجامعة في انتظار وصول عمار.
كانت همس تتناول العصير بهدوء، بينما كانت ميان تلومها:
“إنتِ غلطانة، وطولة لسانك سبب اللي حصل. هيحطنا كلنا في دماغه.”
لينا بغيظ:
“اتحملنا المشكلة بسببك لمجرد إننا أصحابك.”
ميان بغيظ:
“هو اللي ظلمنا، وطردنا من محاضرته بسببك. بس خلاص، الموضوع حصل.”
لينا بحرج:
“إنتِ مش قولتي ابن خالتك جاي يا ميان؟ مش عارفة هنطلب منه إزاي.”
همس بضيق:
“أنا ناوية أعمل اللي جيت الجامعة عشانه النهارده. واللي هتبقى معايا ياريت تبطل تعليقات. عارفة إني غلطانة، ولو المحاضرة عدت تمام كنت هعتذر.”
زفرت لينا وميان بغيظ.
في تلك اللحظة توقفت سيارة عمار السوداء أمامهن، وترجل منها ملقيًا عليهم السلام:
“صباح الخير يا قمامير.”
ثم نظر إلى ميان قائلًا بمشاكسة:
“صباح الفل يا ميمونة.”
ميان بغيظ:
“متضايقنيش، أنا أصلًا متضايقة ومش ناقصة.”
تبادل معها الحديث لدقائق ليعرف سبب ضيقها، ثم قال لها بمزاح:
“يا بنتي عادي. أنا متعود على كده. لدرجة لو عدى يوم من غير ما أتعرض لموقف في الجامعة أحس إن فيه حاجة ناقصة.”
ضحكت لينا بخفوت.
وأثناء حديثه مع ميان، ألقى نظرة عابرة على لينا وهمس، ثم توقف قليلًا عند لينا.
كانت فتاة ذات شعر أشقر مجعد، ترتدي فستانًا يصل إلى ما بعد ركبتيها، وفوقه سترة من الجينز، وكانت ملابسها محتشمة.
توقفت عيناه عند وجهها، ولاحظ عينيها ذات اللون الأخضر العسلي.
لاحظت لينا نظراته، فخفضت وجهها بخجل، ولم تكن الوحيدة التي لاحظت ذلك، فقد انتبهت ميان وهمس أيضًا.
رفعت همس يدها أمام عينيه بعدما نادته أكثر من مرة:
“إنت يا أستاذ، يا شبح!”
ضحكت ميان، فتابع عمار بدهشة:
“شبح؟!”
ضحكت ميان ولينا، بينما أُعجب عمار أكثر بابتسامة لينا.
وقال في نفسه:
“يا نهار أبيض، هو في جمال كده؟”
ثم ابتسم وقال لميان:
“مش تعرفينا على بعض؟”
ميان وهي تشير لهمس ولينا:
“همس ولينا، صحابي من وأنا صغيرة.”
ثم أشارت إلى عمار:
“عمار ابن خالتي، حكيت لكم عنه قبل كده.”
همس بتعجل:
“آه عارفينه. سيبكم من كل ده. المهم، الدكتور اللي بيدرس لنا السنة دي حاططنا في دماغه. مش هيخلينا نحضر له طول السنة. عايزين نعمل له حركة تخليه يعرف إننا مش هنستسلم، تساعدني؟”
ضحك عمار قائلًا بحماس:
“بغض النظر عن شبح وبرنس والحاجات دي، أنا موافق. أهو نرجع لأيام الشقاوة.”
غادر الأربعة متفرقين نحو الجراج، غافلين عن زوج من العيون التي كانت تراقبهم من البداية.
كان يزن يتابعهم من بعيد، ثم رأى ما فعلوه بسيارته، فتأكد أن همس وراء الأمر.
بعدها توجه إلى الخارج وسبقهم منتظرًا بجانب سيارته.
كان الأربعة متوجهين إلى سيارتهم، لكن ميان توقفت فجأة عندما وقعت عيناها على سفيان من بعيد.
تعالت ضربات قلبها، ورددت بصوت منخفض:
“سفيان!”
عمار بصدمة وتعجب:
“بتعمل إيه هنا يا سفيان؟”
سفيان بغضب:
“إنت اللي بتعمل إيه هنا؟”
عمار بهدوء:
“كنت بشوف ميان وبطمن عليها.”
سفيان بغضب:
“تطمن عليها ولا بتدخل نفسك في مشاكل عشانها؟”
عمار بتحذير:
“سفيان، حاسب على كلامك. دي بنت خالتك.”
صرخ عليه شقيقه بغضب:
“قولتلك قبل كده، ملناش دعوة بالعيلة دي. أنا مش ناسي اللي حصل لنا منهم.”
عمار بحدة:
“اللي حصل زمان مسؤولية شخص واحد، وأنا عمري ما هاخد حد بذنب التاني. ميان بنت خالتي، وأشوفها في أي وقت هي وخالتو عليا. إنت رافض، ده يرجعلك ويخصك إنت، مش أنا.”
سفيان بغضب:
“بتعصى كلامي يا عمار؟”
عمار بغضب:
“أعصي كلامك لما يكون غلط، ولما تكون عايز تسحبني معاك في نفس الغلط.”
إلى هنا ولم تستطع ميان الصمت أكثر، فقالت للفتيات:
“سيبونا معاهم خمس دقايق من فضلكم.”
نفذوا ما قالت، ليبادر سفيان بالحديث قائلًا بسخرية:
“إيه؟ ناوية تعملي نفس اللي عملتيه على عمار عشان تصعبي عليا؟”
قاطعته ميان بقهر:
“إنت ظالم وقاسي. اللي قدامي ده مش سفيان اللي كنت بجري عليه لما أكون محتاجة أمان. مش سفيان اللي عمره ما جرحني بكلمة.”
أشاح بوجهه بعيدًا، لتتابع هي بحزن:
“نسيت وعودك ليا زمان؟ بتقول إني بمثل؟ طب إنت تبقى إيه؟ إنت كمان كنت بتقول كلام ووعود، ولما حصل اللي حصل كل شيء اتغير. كأنك كنت مستني حجة عشان تبعد.”
تظاهر بالبرود رغم تأثره، لكنه تذكر الماضي وعاد لقسوته قائلًا:
“أداء حلو، لكن مش هتأثر فيا. أنا عارف كويس اللي حصل زمان.”
نفت قائلة بحزن ودموع:
“مش بقولك كده عشان أصعب عليك. أنا بقولك عشان تعرف مين اللي كان صادق ومين اللي ظلم.”
صعدت إلى سيارتها دون حديث آخر وهي تبكي من شدة الألم.
كانت تتمنى أن تنتزع هذا الحب من قلبها، وأن تتخطاه وتعيش بسلام كما ظنت أنه فعل.
غادر خلفها، وكلما شعر بالشفقة عليها، تذكر الماضي وما يعتقد أنه حدث وقتها، فعاد وأغلق قلبه أمامها مرة أخرى.
منذ الصباح، كانت سيلين تدور من مكان لآخر، محاولة إيجاد عمل تنشغل به وتبقى خارج المنزل لأطول وقت ممكن، لتتجنب كلمات والدتها القاسية التي تؤلمها أكثر من كلام الغرباء.
والدتها التي كان من المفترض أن تقف بجانبها وتساندها، أصبحت أكثر شخص يلقي عليها اللوم والعتاب.
ليتها منذ أن أصبحت مطلقة لم تجد كل هذا الضغط. كانت تشعر أنها ارتكبت خطأ واحدًا، وهي الآن تدفع ثمنه كل يوم.
أغمضت عينيها وهي تجلس على أحد المقاعد الجانبية في الشارع، متذكرة كلمات والدتها عندما علمت أنها ستبحث عن عمل:
“إنتِ ناوية تتعبي قلبي بعمايلك دي؟ مش كفاية اللي حصل زمان؟ عايزة الناس تتكلم أكتر؟ شغل إيه؟ اقعدي في البيت وبلاش نسمع كلام زيادة.”
نظرت لها سيلين مطولًا وقالت بحسرة بعد صمت دام دقائق:
“يا ريتك ما جبتيـنيش الدنيا دي، ويا ريتك ما كنتيش أمي ولا أنا كنت بنتك. يا ريت كان بإيدي أختار أم ليا.”
قالتها ثم غادرت المنزل، بعدما كانت قد حصلت على موافقة والدها الحنون الذي كان أقرب إليها من والدتها.
هربت دمعة من عينيها بحزن، والندم ينهش قلبها من الداخل على ما فعلته في الماضي. ها هي الآن تواجه نتائج قراراتها.
عادت إلى منزلها بعد أن استطاعت العثور على عمل في أحد المطاعم الكبرى، وعادت إلى غرفتها متجاهلة كلمات والدتها.
في مكتب سفيان بشركة العزايزي
كان يقف أمام الزجاج الشفاف الذي صنعت منه واجهة مكتبه، يشاهد حركة السير في الشوارع بشرود.
كانت كلمات والدته كاميليا القاسية تتردد في أذنه، وكانت آخر الكلمات التي سمعها منها منذ سنوات طويلة.
Flashback
كانت تقف أمام والده قائلة بكل برود:
“زي ما سمعت يا شريف، أنا عايزة ننفصل.”
سألها بصدمة:
“ننـفصل ليه؟ أنا عملتك حاجة؟ ده أنا عمري ما ضايقتك بكلمة. طب وولادنا؟”
أجابته ببرود:
“ربيهم إنت. السبب اللي كنت مستحملة الحياة معاك عشانه راح.”
ردد بصدمة:
“سبب؟”
أومأت له قائلة:
“تقدر تقولي هتصرف عليا منين؟ هنعيش إزاي؟ اللي نفسي فيه هتقدر توفره ولا لأ؟ أنا مقدرش أعيش في مستوى أقل من اللي اتعودت عليه.”
سألها بصدمة وعدم استيعاب:
“هتسيبي ولادك عشان الفلوس؟ طب وأنا؟ حبنا وكل السنين دي مش مهمين عندك؟”
أجابته:
“الحب والعواطف مش هيصرفوا عليا ويخلوني أعيش مرتاحة.”
ردد بصدمة وألم:
“هقف على رجلي من تاني وهقدر أرجع زي ما كنت، بس خليكي جنبي. أنا بحبك يا كاميليا.”
كاميليا بنفاد صبر:
“كل ده كلام مش مضمون. وأنا مصممة على قراري. ياريت ننفصل بهدوء ومن غير مشاكل.”
ثم غادرت المكان، تاركة خلفها صدمة كبيرة لدى الجميع.
نظر شريف خلفها بخيبة أمل، وكأنه يرى حقيقتها لأول مرة.
كان سفيان حينها في بداية المرحلة الجامعية، بينما كان عمار في المرحلة الإعدادية، وقد سمعا كل شيء.
كان عمار يبكي بصمت، بينما ظل سفيان ينظر إليها وهي تغادر، رغم أن داخله كان ينهار من شدة الصدمة.
كانت تلك الليلة بداية ابتعاده عن والدته وعن كل من يرتبط بها.
وفي نفس اليوم تعرض والده لأزمة صحية حادة، وكاد أن يفقده، فزاد ذلك من غضبه وألمه.
نهاية الفلاش باك
انتشله من ذكريات الماضي صوت باب مكتبه الذي فُتح، ودخل شخص للداخل دون إذن.
التفت وكاد أن يوبخه، لكنه صمت واتسعت عيناه بدهشة عندما رأى ابن عمه قصي أمامه.
ما إن دخل قصي حتى قال باشتياق:
“واحشني يا ابن عمي.”
سرعان ما تحولت دهشة سفيان إلى سعادة، واتجه نحو ابن عمه معانقًا إياه:
“واحشني يا أخويا.”
تبادل الاثنان العناق باشتياق، وبعد لحظات ابتعدا، ليردد سفيان بسعادة:
“فريدة هتفرح أوي لما تشوفك، هي وعمار.”
قصي باشتياق:
“وحشتوني أوي والله، وأمي وحشتني كمان.”
سفيان بضيق:
“حاولت معاها كتير تسيب بيتها وتيجي تقعد معانا، رافضة. مش عايزة تسيب بيت عمي الله يرحمه.”
قصي بحزن:
“الله يرحمه.”
سفيان بتساؤل:
“ما قلتليش ليه إنك جاي النهارده؟ كنت استقبلتك في المطار أنا وعمار.”
أجابه بابتسامة بسيطة:
“حبيت أعملها مفاجأة للكل.”
سفيان بسعادة وهو يربت على كتفه:
“أحلى مفاجأة والله. خلينا يلا نروح الفيلا تسلم على فريدة وعمار. عمار مجاش الشغل النهارده، ونتغدى كلنا سوا زي زمان.”
قصي بابتسامة:
“تمام، بس هسلم عليهم وهمشي. أمي وحشتني أوي، وكمان عايز أرتاح من تعب السفر.”
على مضض وافق سفيان، على أن يكون لقاؤهم العائلي في يوم آخر.
بعد أن انتهى يزن من محاضراته المقررة، توجه إلى جراج الجامعة.
توقفت خطواته عندما رأى سيارته وقد تعرضت لأضرار كبيرة، والإطارات غير موجودة، وعلى جوانبها علامات واضحة لما حدث.
أغمض عينيه بغضب، متوعدًا بالوصول إلى الشخص الذي فعل ذلك.
ألقى نظرة أخيرة على السيارة قبل أن يغادر، لكنه استوقفه شيء لامع على الأرض بجانبها.
التقطه بيده، ليجد أنه طوق صغير يتدلى منه قلب منقوش بداخله اسم “همس”.
جز على أسنانه قائلًا بغضب:
“جابته لنفسها. وحياة أمي لأعرفها إن اللي حصل ده مش هيتكرر.”
طلب من سائق والده أن يأتي إلى الجامعة ويتولى أمر السيارة، بينما خرج هو من الجامعة وهو غاضب من تصرف همس، ويتوعد بأن يجعلها تتحمل نتيجة ما فعلته.
وفي أحد المباني الكبيرة التي لا يسكنها سوى أصحاب المستوى المادي المرتفع، كان قصي يضع رأسه على قدم أمه بعد عناق طويل، ودموع التأثر تملأ عينيهما، بينما كانت تعاتبه على كل ذلك الغياب.
قالت له:
“إنت مش هتسافر تاني وتبعد عني؟ أنا كبرتك وربيتك عشان تفضل جنبي، مش عشان تسيبني.”


